गंगाखेड (प्रतिनिधी):-
ग्रामीण भागातील अनेक नागरिकांनी वर्षानुवर्षे खराब रस्त्यांचा त्रास सहन केला आहे. विशेषत: पावसाळ्यात वाहतुकीची होणारी अडचण, विद्यार्थ्यांचे शिक्षण, शेतकऱ्यांच्या मालाची बाजारपेठेत ने-आण, रुग्णांना वेळेत उपचारासाठी पोहोचविण्याची धडपड आणि दैनंदिन जीवनातील अनेक अडचणी आपण अनुभवलेल्या आहेत. आज त्या अडचणी दूर करण्याच्या दिशेने एक महत्त्वाचे पाऊल टाकले जात आहे. कारण शिक्षण, आरोग्य, शेती, व्यापार, उद्योग, रोजगार आणि सामाजिक प्रगती या सर्वांचा पाया सक्षम रस्ते व्यवस्थेवर उभा असतो. त्यामुळे रस्ता हा केवळ माती, दगड आणि डांबराचा पट्टा नसतो, तर तो गावाला विकासाशी जोडणारा दुवा असतो, असे प्रतिपादन स्थानिक आमदार डॉ.रत्नाकर गुट्टे यांनी केले.
तालुक्यातील विविध गावांमध्ये मुख्यमंत्री ग्रामसडक योजनेतंर्गत प्रमुख मार्गावरील प्रस्तावित रस्त्यांच्या कामांचे भूमिपूजन आ.डॉ.गुट्टे यांच्या शुभहस्ते करण्यात आले. त्यावेळी ते बोलत होते. त्यामध्ये मौजे.उंडेगाव येथील राज्यमार्ग २३४ ते उंडेगाव, मौजे.कुंडगीरवाडी येथील राज्य मार्ग २५१ ते कुंडगीरवाडी ते रेवतांडा, मौजे.धारासूर येथील राज्य मार्ग २४८ ते धारासूर, मौजे.देगाव, (ता: पूर्णा) येथील राज्यमार्ग २४१ देगाव ते जिल्हा सरहद्द रस्त्याची सुधारणा करणे आदी कामांचा समावेश आहे. यावेळी आपल्या गंगाखेड विधानसभा मतदारसंघात दर्जेदार पध्दतीने पायाभूत सुविधा उपलब्ध करून देण्यासाठी कटिबद्ध असल्याची ग्वाही त्यांनी दिली.
पुढे बोलताना आ.डॉ.गुट्टे म्हणाले की, मुख्यमंत्री ग्राम सडक योजनेअंतर्गत विविध रस्ते दुरुस्ती कामांच्या भूमिपूजनासाठी आपण एकत्र आलो आहोत. हा केवळ भूमिपूजनाचा कार्यक्रम नाही, तर ग्रामीण विकासाच्या नव्या पर्वाची सुरुवात आहे. कारण एखाद्या प्रदेशाच्या विकासाचा पाया हा त्या भागातील रस्त्यांवर उभा असतो. रस्ता हा फक्त एका गावाला दुसऱ्या गावाशी जोडत नाही, तर तो माणसांच्या आशा, स्वप्ने, अर्थकारण आणि विकासाला जोडणारा महत्त्वाचा दुवा असतो. त्यामुळे नियोजित असलेली ही सर्व कामे राज्य शासनाच्या विकासाभिमुख धोरणांची साक्ष आहेत. मात्र कोणतेही विकासकाम टिकाऊ होण्यासाठी त्याची गुणवत्ता, पारदर्शकता आणि वेळेत पूर्तता तितकीच महत्त्वाची आहे. त्यामुळे ही कामे दर्जेदार होतील, याकडे विशेष लक्ष देणे ही लोकप्रतिनिधी, अधिकारी, कंत्राटदार आणि नागरिक या सर्वांची सामूहिक जबाबदारी आहे.
मुख्यमंत्री ग्रामसडक योजना ही ग्रामीण भागाला सक्षम पायाभूत सुविधा उपलब्ध करून देण्याचा दूरदृष्टीचा विचार आहे. शहर आणि गाव यांच्यातील विकासाची दरी कमी करण्यासाठी अशा योजना अत्यंत महत्त्वाच्या ठरतात. विकासाचा अधिकार हा प्रत्येक नागरिकाचा आहे आणि तो प्रत्येक गावापर्यंत पोहोचला पाहिजे, हीच या योजनेमागील व्यापक भावना आहे. तसेच सर्वांगीण विकासाचा मार्ग नेहमीच सहकार्य, एकोप्याची भावना आणि सकारात्मक विचारातून तयार होत असतो. मतभेद असू शकतात, पण गावाच्या विकासाच्या प्रश्नावर आपण सर्वांनी एकत्र उभे राहणे, हीच खरी लोकशाहीची ताकद आहे, असेही आ.डॉ.गुट्टे यांनी नमूद केले.
कोणत्याही गावाचा विकास केवळ शासनाच्या निधीवर होत नाही, तर लोकसहभाग, लोकप्रतिनिधींचे प्रयत्न, प्रशासनाची कार्यक्षमता आणि ग्रामस्थांची सकारात्मक भूमिका यांच्याही एकत्रित योगदानातून होत असतो. विकास ही सामूहिक जबाबदारी आहे. त्यामुळे हा रस्ता पूर्ण झाल्यानंतर त्याचे जतन आणि संवर्धन करण्याची जबाबदारीही आपलीच आहे, असेही आ.डॉ.गुट्टे यांनी आवर्जून स्पष्ट केले. यावेळी समाज कल्याण सभापती लक्ष्मण मुंडे, पंचायत समिती विजय मुंडे, रामभाऊ देवकते यांच्यासह संबंधित विभागाचे अधिकारी व कर्मचारी तसेच गुट्टे काका मित्र मंडळाचे प्रमुख पदाधिकारी, कार्यकर्ते आणि स्थानिक नागरिक मोठ्या संख्येने उपस्थित होते.
चौकट क्रमांक १
…तर ही सर्वांची नैतिक आणि सामाजिक जबाबदारी!
कोणत्याही कामामध्ये पारदर्शकता, गुणवत्ता आणि वेळेचे महत्त्व अत्यंत मोठे आहे. त्यामुळे नियोजित सर्व रस्ते हे उच्च दर्जाचे, टिकाऊ आणि निर्धारित कालावधीत पूर्ण व्हावेत, ही प्रत्येक नागरिकाची अपेक्षा आहे. शिवाय सार्वजनिक निधी हा जनतेचा विश्वास असतो. त्यामुळे प्रत्येक रुपयाचा योग्य वापर होणे ही सर्व संबंधितांची नैतिक आणि सामाजिक जबाबदारी आहे. कारण रस्ते गावांना जोडतात, पण विकास मनांना जोडतो. त्यामुळे प्रस्तावित सर्व रस्ते हे सर्वांगीण विकासाचा, सामाजिक प्रगतीचा आणि आर्थिक समृद्धीचा नवा अध्याय ठरतील, असाही विश्वास आ.डॉ.गुट्टे यांनी आवर्जून व्यक्त केला.